29 сәуірде Оқушылар сарайының 2-корпусы базасында «Үздік жас жүргізуші – 2026» аймақтық кәсіби шеберлік байқауы өтті. Байқау жол қозғалысы қауіпсіздігін насихаттауға және жастарды ерте кәсіптік бағдарлауға бағытталған.
Іс-шараға «Көлік ісі» және «Көлік жөндеуші слесарь» үйірмелерінің тәрбиеленушілері, ҚВПТК (Қарағанды жоғары политехникалық колледжі), «№13 мектеп-қосымша білім беру орталығы» КММ, Абай көпсалалы колледжінің студенттері, сондай-ақ «Отан 09» автомектебі мен Шахтинск технологиялық колледжінің (ШТК) білім алушылары қатысты.
Байқауда қонақтар мен қазылар алқасының мүшелері ретінде келесі тұлғалар болды:
Мусина Мария Уалихановна – «Қарағанды облысының автомектептер қауымдастығы» көлік құралдары жүргізушілерін даярлау жөніндегі кәсіби бірлестігінің басшысы;
Бобрышев Александр Олегович – «QazTehna» ЖШС персоналды оқыту және дамыту жөніндегі маманы.
Сондай-ақ қазылар алқасының құрамында Шахтинск қалалық полиция бөлімінің қызметкерлері де болды.
Қатысушылар үш пән бойынша бақ сынасты: Жол қозғалысы ережелері (ЖҚЕ) билеттері бойынша тестілеу, автокөлікті жолға шығар алдында тексеру және көлік жүргізу.

Еркін күрестен 2013, 2014, 2015-2016, 2017 ж.т. кіші жасөспірімдер арасында КСРО халықаралық дәрежедегі спорт шебері, ҚР спорт қайраткерлері М.Ю. Абдул-Муслимов пен Д.Т. Бачиевті еске алуға арналған «ABADAN» спорт академиясының облыстық ашық турнирі 2026 жылдың 1-3 мамыр күндері Қарағанды қаласында өтті.
Осы жарыста Бекболат Нұрәлі 40 кг салмақ дәрежесінде жүлделі 3-орынға ие болды.
Жеңісің құтты болсын! Алдағы жарыстарда биік белестерді бағындыруыңа тілектеспіз.

5 мамыр күні Қарағанды қаласында «Dosimetric Robot – 2026» облыстық байқауы өтті.
Байқау аясында мектеп оқушылары мен студенттерге төтенше жағдай аймақтарында жұмыс істеуге қабілетті мобильді робот әзірлеу тапсырылды. Бұл құрылғы адам өміріне қауіп төндірмей, зиянды заттарды анықтап, зерттеу жұмыстарын жүргізуі тиіс болатын.
Біздің жас өрендеріміз жоғары дайындық деңгейін, инженерлік шеберліктерін және топпен жұмыс істеу дағдыларын көрсетіп, заманауи әрі қызықты жобаны ұсынды.
Байқау қорытындысы бойынша 15 команданың ішінен Шахтинск қаласының құрама командасы (Оқушылар сарайы мен №6 ЖББМ) жүлделі 1-орынды иеленді!
Біздің демеушілеріміз - Сенин Сергей Николаевичке («Айболит» дәріханасы) және Мустафин Радик Дилшатовичке («Уголёк» жазғы дәмханасы) көрсеткен қолдаулары үшін ерекше алғыс білдіреміз.
Жеңімпаздарды және олардың жетекшілерін лайықты жеңістерімен құттықтаймыз! Оларға алдағы уақытта жаңа белестерді бағындыруды, тың идеялар мен толағай табыстар тілейміз!

8 мамырда Е. Бөкетов атындағы ЖББМ базасында қала мектептерінің бейіндік жасақтары арасында «Жас өрт сөндірушілер мен құтқарушылар» жасақтарының қалалық жиыны өтті.
Іс-шара аясында Шахтинск қалалық Төтенше жағдайлар бөлімінің қызметкерлері өз жұмысының түрлі бағыттарын көрсетіп, оқушыларға кедергілер жолағынан өтуге мүмкіндік берді. Сондай-ақ қатысушылар қауіпсіздік мәселелері мен төтенше жағдайларға арналған тақырыптық плакаттар дайындады.
Жиын танымдық әрі қызықты өтіп, балалардың жауапкершілігін, командалық рухын және қауіпсіздік саласындағы білімдерін дамытуға ықпал етті.
Жиын қорытындысы бойынша барлық қатысушылар дипломдармен және естелік сыйлықтармен марапатталды.